Autoritetet lokale të Rio Grande do Sul njoftojnë se numri i të vdekurve nga shirat ka shkuar në 56 persona, ndërsa dhjetëra të tjerë ende nuk janë gjetur. Mbi 69 mijë persona janë zhvendosur pas përmbytjeve që kanë prekur dy të tretat e qyteteve të shtetit, i cili kufizohet me Uruguain dhe Argjentinën.

Përmbytjet masive kanë shkaktuar shkatërrime në rrugë dhe ura, si dhe rrëshqitje dhe shembje të pjesshme të një dige në një hidrocentral të vogël. Guvernatori i shtetit thekson nevojën për një “Plan Marshall” për të rikuperuar nga stuhitë dhe pasojat e tyre, duke u referuar në një plan për rimëkëmbjen ekonomike të Evropës pas Luftës së Dytë Botërore.

Ndërkohë, shqetësimi më i madh është për përhapjen e ndonjë epidemie, pasi përmbytjet kanë dëmtuar rrjetin e furnizimit me ujë të pijshëm në shumë zona.