Në mbështetje të nismës së Bashkisë së Tiranës për transportin e gjelbër, deputeti socialist Fatmir Xhafaj u shpreh nga Kuvendi se ka besim te ekipi i Bashkisë dhe specialistët që kanë punuar për këtë projekt.

Ai theksoi se Tiranë është më e zhvilluar sot, falë përpjekjeve të Bashkisë dhe ekipit drejtues, duke krahasuar me disa vjet më parë.

Xhafaj tha se marrëveshja me KFW hap një faqe të re në infrastrukturën urbane dhe në shërbimin ndaj qytetarëve, duke lehtësuar lëvizjen përmes transportit të shërbimit publik.

Deputeti nënvizoi se vota për këtë projekt do të thotë votë për lehtësimin e shërbimit të transportit publik dhe për një mjedis më të mirë dhe më të shëndetshëm për banorët e Tiranës.

“Ti thuash PO këtij projekti do të thotë ti thuash PO lehtësimit të shërbimit të transportit publik në akset kryesore të qytetit, ti thuash PO cilësisë më të mirë të jetës së qytetarëve që e mbështesin lëvizjen e tyre, te ky lloj shërbimi. Ti thuash PO këtij projekti të lëvizjes vetëm me autobus elektrik do të thotë ti thuash PO një mjedisi më të mirë dhe më të shëndetshëm të banorëve dhe fëmijëve të këtij qyteti. Ne duhet t’i shprehim mirënjohjen qeverisë gjermane për mbështetjen financiare ndaj këtij projekti kaq të mirëpritur prej nesh. Qeveria gjermane është një nga donatorët dhe financuesit kryesorë të shumë projekteve të zhvillimit, projekte që kanë rezultuar shumë të suksesshme në disa aspekte, falë edhe faktit që strukturat e tyre ndjekin me rigorozitet maksimal cilësinë dhe efektshmërinë e projekteve të financuara prej tyre. Ndaj, vota PRO është edhe një shprehje mirënjohjeje ndaj këtij partneri të rëndësishëm për mbështetjen që jep, por edhe për besimin që shpreh ndaj institucioneve tona”, deklaroi Xhafaj.