Erdgys Arrazi ndodhet në paraburgim në burgun e Reçit, i akuzuar për “shkaktim të vetëvrasjes” pas një tragjedie të rëndë që tronditi Shkodrën më 2 maj, ku Alma mbyti fëmijët e saj në lumin Buna dhe më pas u vetëhodh.

Hetimet janë ende në vijim, ndërsa pritet që të dalin rezultatet e analizave toksikologjike të bëra ndaj trupave të të ndjerës dhe fëmijëve të saj. Hetuesit po presin gjithashtu një akt të dytë nga policia shkencore mbi telefonin e Arrazit, i cili dyshohet se ka fshirë çdo lloj komunikimi me bashkëshorten e tij. Hetuesit shpresojnë të rikthejnë bisedat për të hetuar më tej rreth mundësisë së kërcënimeve psikologjike dhe kanosjeve verbale që mund të kenë ndodhur.

Gjatë kohës së mëparshme që Arrazi ka qenë i paraburgosur për vepra të tjera penale, siç është prodhimi dhe shitja e narkotikëve, kartela e tij në burg tregon se ai ka marrë pjesë në programe rehabilituese dhe ka ndjekur trajtime individuale si “aftësimi social” dhe “prezantimi i të menduarit”. Gjatë asaj periudhe, ai kishte realizuar tre biseda me familjen përmes Skype dhe kishte pasur vetëm një takim fizik me ta, ku deklaronte se marrëdhëniet me familjen ishin të mira dhe të qëndrueshme.

“I paraburgosuri mban kontakte me familjen sipas mundësive social-ekonomike, ku për këtë periudhë 2-mujore referuar regjistrit të bisedave me familjen, rezulton se ka realizuar 3 biseda skype, konkretisht, datat 1-8 prill deh 6 maj. Me familjarët ka zhvilluar 1 takim fizik me familjen në datën 24 maj. Pohon se me familjen ka marrëdhënie të mira dhe të qëndrueshme”-thuhet në kartelë.

Ky rast vazhdon të mbajë vëmendjen e opinionit publik dhe të autoriteteve, të cilët po përpiqen të zbulojnë të vërtetën pas kësaj tragjedie të rëndë.