Një helmim masiv i qenve endacakë është raportuar në qytetin e Vlorës, vetëm dy ditë pasi një turiste italiane u kafshua teksa po vraponte në “Lungomare”. Dyshohet se helmimi mund të jetë organizuar nga punëtorët e Bashkisë Vlorë si “rruga më e shkurtër” për të trajtuar këtë problem.

Shqetësimi për dhjetëra qen endacakë që qëndronin në zonën e “Lungomares” në Vlorë ishte ngritur nga qytetarë të shumtë prej disa javësh, por Bashkia e qytetit nuk kishte marrë asnjë masë deri tani. Pas incidentit me turisten, duket se autoritetet kanë vendosur të zgjedhin rrugën e helmimit, duke lënë të traumatizuar dhjetëra turistë dhe qindra banorë të tjerë, të cilët kanë qenë dëshmitarë të skenave makabre.