Gjykata e Posaçme ka sekuestruar pasuri me vlerë rreth 3 milionë euro, përfshirë apartamente, njësi shërbimi dhe makina, të dyshuara në pronësi të ish-drejtorit të Operacionales, Oltion Bistri.

Vendimi erdhi pas kërkesës së SPAK, e cila dyshon se këto pasuri nuk justifikohen nga të ardhurat e familjarëve dhe ish-drejtorit, dhe mund të jenë përfituar nga aktivitete të paligjshme.

Në një njoftim zyrtar, Prokuroria e Posaçme bëri të ditur se janë bllokuar 18 njësi të përshtatura për dyqane dhe ambiente të tjera biznesi, 10 apartamente, 1 vilë, 1 truall dhe një makinë, të gjitha të regjistruara në emër të familjarëve të Bistrit. Pronat ndodhen në zona të ndryshme të Tiranës, si rruga e Kavajës, rruga e Kosovarëve dhe Selitë.

Oltion Bistri është aktualisht në qeli, pasi u arrestua në kuadër të operacionit “Metamorfoza”. Hetimet, bazuar në komunikimet e rrjetit Sky, treguan se Bistri kishte kontakte dhe dyshohet se favorizonte biznesmenin Pëllumb Gjoka, i cili gjithashtu është arrestuar. SPAK konfirmon se dyshimet për përfshirjen e Bistrit në aktivitet kriminal datojnë që prej vitit 2016, megjithatë ai vazhdoi të mbante pozicione të rëndësishme në Policinë e Shtetit deri në arrestimin e tij.