Anija e mallrave Dali pësoi një avari elektrike rreth 10 orë përpara se të largohej nga porti i Baltimorës dhe përsëri pak para se të përplasej me urën “Francis Scott Key”, duke shkaktuar vdekjen e gjashtë punonjësve të mirëmbajtjes së urës, raportuan hetuesit federalë të martën.

Incidenti filloi kur një pjesëtar i ekuipazhit mbylli gabimisht një pajisje për shkarkimin e tymit, duke shkaktuar bllokimin e motorit të anijes, sipas raportit paraprak të Bordit Kombëtar të Sigurisë së Transportit (NTSB). Pas largimit nga porti, anija u përplas me një kolonë mbajtëse të urës pasi një ndërprerje e dytë e energjisë çoi në humbjen e kontrollit.

Raporti zbardh detaje të reja mbi trajtimin e problemeve nga ana e ekuipazhit pas avarisë elektrike ndërsa anija ishte e ankoruar në Baltimorë. Testimi i karburantit të anijes nuk zbuloi ndonjë problem me cilësinë e naftës.

Pas ndërprerjes fillestare të energjisë, gjeneratori për raste emergjente u ndez automatikisht, por presioni i pamjaftueshëm i karburantit bëri që gjeneratori të shuhej, duke shkaktuar ndërprerjen e dytë të energjisë. Ekuipazhi aktivizoi gjeneratorin dhe kërkoi ndihmë nga rimorkiatorët. Kapiteni dha urdhër për hedhjen e spirancës, por ndodhi ndërprerja e dytë e energjisë dhe ekuipazhi paralajmëroi trafikun ujor. Anija goditi urën duke shkaktuar shembjen e një segmenti të saj.

Byroja Federale e Hetimeve (FBI) ka nisur një hetim penal lidhur me rrethanat që çuan në shembjen e urës. Policia veproi me shpejtësi për të ndaluar trafikun në urë, duke parandaluar një tragjedi edhe më të madhe.

Anija e kontejnerëve Dali, nga Singapori, po nisej nga porti i Baltimorës për në Sri Lanka kur u përplas me urën. Hetimi i plotë mund të zgjasë një vit ose më shumë, sipas zyrtarëve.