Gjatë fjalës së saj në Kuvend, deputetja e Partisë Demokratike, Ina Zhupa, ka ngritur shqetësimin lidhur me linjën e trenit që është vendosur së fundi brenda parkut të Syrit të Kaltër për transportin e turistëve. Zhupa e konsideroi këtë si një tjetër abuzim me pushtetin.
Zhupa i drejtoi një pyetje ministres Mirela Kumbaro lidhur me përfshirjen e nënkryetarit të Bashkisë Sarandë, Elton Dauti, në këtë investim privat. “A është bashkëshortja e tij, Stela Qesari, aksionere e fshehtë e këtij biznesi?” pyeti Zhupa. Ministrja Kumbaro refuzoi të përgjigjej, ndërsa deputetja vijoi me akuza për mungesë transparence.
Shërbimi privat me tren në Syrin e Kaltër ka nisur vetëm këtë sezon, dhe kompania që e ofron është “Saranda Taxi”. Ka dyshime se pas kësaj kompanie fshihet nënkryetari i Bashkisë Sarandë. Të ardhurat nga ky shërbim janë të konsiderueshme, pasi gjatë sezonit në Syrin e Kaltër shkojnë mijëra turistë, të cilët paguajnë rreth 5 euro për transport.
