Ministri i Brendshëm, Taulant Balla, ka publikuar pamje nga operacioni i sotëm, gjatë të cilit janë lëshuar 43 urdhër arreste pas zbardhjes së disa ngjarjeve kriminale nga SPAK. Në video shihen forcat RENEA duke ndërhyrë në vilat e personave të shpallur në kërkim, duke u ngjitur me shkallë.

“Lufta kundër krimit të organizuar falë bashkëpunimit me SPAK dhe agjencitë e tjera ligjzbatuese, si dhe vetëpastrimi i Policisë së Shtetit nga punonjësit e Policisë të lidhur me ta, janë të pandalshme dhe po japin rezultate për rritjen e parametrave të sigurisë në komunitet, krijimin e një trupe policore të denjë dhe me integritet, si dhe për rritjen e besimit të qytetarëve tek Policia e Shtetit. Besimi i qytetarëve është elementi kyç që Policia të përmbushë misionin e saj,” shkruan Balla.

Më shumë se 40 urdhër arreste, disa prej të cilave janë ekzekutuar, u lëshuan pas zbardhjes së disa ngjarjeve kriminale, përfshirë vrasje të rënda dhe atentate që nga viti 2018. Emrat në masë sigurie janë shumë të njohur në botën e krimit, duke përfshirë Klani Duka në Tiranë, Ervis Martinaj, Indrit Dogle, Fatmir Hyseni, ish-deputeti i PS Arben Ndoka, Fatmir Hyseni në Vlorë, dhe Lulzim Berisha, aktualisht në burgjet e Spanjës.

Dhjetëra forca të RENEA, FNSH, nisën kontrollet herët në mëngjes, nga Veriu në Jug; në Shkodër, Lezhë, Kurbin, Fushë Krujë, Nikël, Tiranë, Durrës, e Vlorë. Kontrolle u bënë edhe në bazat e Ervis Martinajt në Fushë Kuqe, tashmë dy vjet i zhdukur. Në krye të këtij megaoperacioni është vendosur vetë kreu i SPAK, Altin Dumani, i cili pritet të dalë dhe të tregojë se çfarë është bërë zyrtarisht.