Azgan Mërnica, 23-vjeçari që ekzekutoi me plumb në kokë efektivin e “Shqiponjave” Novruz Cenalia, u paraqit sot në gjykatë për t’u njohur me masën e sigurisë.

I veshur me antiplumb dhe i shoqëruar nga dy furgona policie, Azgan Mërnica mbërriti në gjykatën e Fierit rreth orës 13:45 dhe qëndroi aty deri në 15:00. Vonesa u shkaktua nga refuzimi i avokatëve për të mbrojtur vrasësin e policit. Avokati i caktuar kryesisht nga shteti, Xhevair Morina, nuk u paraqit në seancë, duke bërë që sekretaria të thirrte me autoparlant për avokatë të tjerë.

Në fund, gjykata arriti të gjente avokaten Arvenola Dolen, e cila u caktua kryesisht për të realizuar seancën e masës së sigurisë “arrest në burg”. Mbi Azgan Mërnicën rëndon akuza e “vrasjes së punonjësit të policisë së shtetit”, parashikuar në nenin 79/b të Kodit Penal, dhe “armëmbajtjes pa leje”, parashikuar nga neni 278/1 i Kodit Penal.

Gjatë seancës me dyer të mbyllura, 23-vjeçari nuk foli, por i është përgjigjur gjyqtares Dajana Ndrea me “Po” kur ajo e pyeti për autorësinë e krimit. Më herët, ai kishte pranuar krimin e rëndë pa shfaqur pendesë gjatë marrjes në pyetje nga hetuesit. Në ambientet e jashtme të gjykatës nuk ishte i pranishëm asnjë familjar i tij.