Një aksident i rëndë u shënua mesditën e sotme në minierën në Thekën e Martaneshit. Dy minatorë të cilët punonin si vagonistë në minierë u zunë poshtë nga shembja e një masivi mineral teksa po punonin.

Si pasojë e plagëve të marra, minatori Armond Peshku, vetëm 29 vjeç humbi jetën, ndërsa shtetasi Hajdar Bala, rreth 40 vjeç është transportuar në spital për ndihmë mjekësore, njoftoi policia e Dibrës. Aksidenti i rëndë u shënua sot rreth orës 12:50 (21 maj 2024).

Bala është nisur me urgjencë me helikopter drejt spitalit të Traumës në Tiranë, ku iu nënshtrua operacionit. Gjendja e tij është stabël, por ka fraktura dhe dëme në shtyllën kurrizore.

Burime paraprake për Report TV bëjnë me dije se subjekti minerar në të cilin ka ndodhur aksidenti është ‘Ylberi sh.p.k’.

Grupi hetimor në drejtimin e Prokurorisë, po punon për zbardhjen dhe dokumentimin e rrethanave të kësaj ngjarjeje.

Aksidentet në miniera vijojnë të jenë një problem shqetësues, ndërsa statistikat për vitin 2023 flasin për 26 minatorë të plagosur, një pjesë e të cilëve kanë mbetur të gjymtuar. Përgjatë vitit të kaluar, një minator nuk mundi të mbijetojë dhe humbi jetën. Aksidentet në miniera përfshihen në listën e 3 sektorëve me incidencën më të lartë, bashkë me ndërtimin dhe fasoneritë.