Tonin Qalliaj dhe Lintor Ramushaj janë arrestuar gjatë operacionit të koduar “Peshtani” pasi dyshohet se kanë kultivuar drogë në bashkëpunim me njëri-tjetrin. Policia asgjësoi 295 bimë narkotike të mbjella në tokën e njërit prej të arrestuarve.

“Në zbatim të masave të planit operacional ‘Territor i pastër’, shërbimet e Komisariatit të Policisë Fier kanë finalizuar operacionin ‘Peshtani’, si rezultat i të cilit, bazuar në informacionet e siguruara në rrugë operative, u godit një rast i kultivimit të bimëve narkotike në një zonë pyjore në fshatin Peshtan, Fier. Për këtë rast u arrestuan në flagrancë shtetasit T. Q., 57 vjeç, dhe L. R., 35 vjeç, të dy banues në fshatin Peshtan, pasi në bashkëpunim me njëri-tjetrin, dyshohet se kanë kultivuar bimët narkotike në tokën pronësi të shtetasit T. Q”, njofton policia.

Gjatë kontrolleve në banesa, shërbimet e Policisë gjetën dhe sekuestruan një armë gjahu pa leje dhe 6 celularë, të cilat u konfiskuan në cilësinë e provës materiale.

Materialet procedurale i kaluan Prokurorisë për veprime të mëtejshme.