Ish-kryeministri Sali Berisha ka humbur një tjetër betejë me gjyqësorin, pasi Gjykata e Lartë vendosi sot të mos pranojë rekursin e tij kundër vendimit të Apelit të GJKKO-së që nuk e lejonte të shkonte në Kuvend. Vendimi i Gjykatës së Lartë konfirmon refuzimin e rekursit të paraqitur nga Berisha, kundër vendimit nr. 57(87-2024-84), datë 25.03.2024, të Gjykatës së Posaçme të Apelit për Korrupsionin dhe Krimin e Organizuar.

Që prej 30 dhjetorit 2023, ish-kryeministri Berisha vijon të jetë nën masën e sigurisë ‘arrest shtëpie’ pasi është në hetim për ‘korrupsion pasiv’ lidhur me aferën e privatizimit të ish kompleksit sportiv Partizani, që u pasua me ndërtimin e 19 kullave.

Më 19 janar 2024, Prokuroria e Posaçme (SPAK) rrëzoi kërkesën e Berishës për t’u paraqitur në seancat plenare të Kuvendit, në cilësinë e deputetit. Edhe pse vendimi u ankimua, ai u la në fuqi në të gjitha shkallët e gjyqësorit.