Gjykata e Tiranës ka lënë në fuqi masat e sigurisë për 9 persona të akuzuar për mashtrimin përmes mikrokredive të mijëra qytetarëve. Nga këta, 5 persona janë në arrest në burg, ndërsa 4 janë në arrest shtëpie.

Personat e arrestuar janë Arben Meskuti, Aldo Daka, Albert Gegaj, dhe Edmond Mati, të cilët janë administratorë të shoqërisë Star-FS. Ndërsa Elda Ibro dhe tre përmbarueset Jorsida Dervishi, Alketa Tanushi, dhe Kejda Seferi janë në arrest shtëpie. Arben Kote është ende në kërkim nga policia.

Ky grup i personave është akuzuar për vjedhje dhe shpërdorim detyre në lidhje me skandalin e mikrokredive. Ata akuzohen për krijimin e skemave piramidale që shfrytëzonin qytetarët dhe për marrjen e kredive të këqija nga bankat, duke u detyruar qytetarët të merrnin kredi të tjera për të mbyllur borxhet e tyre. Kjo skemë shkaktoi dëme për mijëra qytetarë.

Procedimi penal për këtë skandal nisi në vitin 2020, dhe gjatë hetimeve u zbulua se shoqëritë e përfshira morën kredi të këqija me shumën totale prej rreth 7.3 milionë euro.

Banka e Shqipërisë ka revokuar licencat e dy subjekteve financiare jobanka, shoqëritë “Final” dhe “Micro Credit Albania”, përkatësisht me administratorë Arben Meskutin dhe Elda Ibron.

Një nga përmbaruesit e arrestuar për skandalin e mikrokredive gjatë seancës për masën e sigurisë në Gjykatën e Tiranës tha se ai është thjesht rrogtar me pagë qesharake.

“Po gjykohen si në komunizëm, kanë ushtruar aktivitet të ligjshëm dhe se nga ana e përmbaruesve janë zbatuar detyrimet. Jam thjesht një rrogtar me një pagë qesharake”, deklaroi një nga personat e akuzuar që ka punuar si përmbarues.