Një ngjarje e rëndë ka tronditur Italinë ditën e djeshme, ku bashkëshorti i eurodeputetes kristiandemokrate Francesca Donato, arkitekti Angelo Onorato, është gjetur i vdekur në makinën e tij në Palermo, në zonën e Via Ugo La Malfa. Shkaqet e vdekjes së Onoratos nuk janë ende të qarta, por zonja Donato ka raportuar me shqetësim te miqtë e saj duke thënë: “Më vranë burrin Anxhelon”.

Ngjarja filloi kur Francesca Donato humbi kontaktet me bashkëshortin e saj që në mëngjes dhe u alarmua sepse ai nuk iu përgjigj asnjë prej telefonatave të saj të përsëritura. Duke përdorur GPS-in e makinës së tij, një Land Rover SUV me ngjyrë jeshile të errët, ajo arriti ta gjente vendndodhjen dhe lajmëroi menjëherë shërbimet e urgjencës.

Angelo Onorato, i cili ishte edhe pronar i një dyqani mobiljesh në Palermo, u gjet i ulur në sediljen e shoferit me një litar të lidhur në qafë dhe me një njollë gjaku në këmishën e tij, fort rreth qafës dhe gojës. Fillimisht u mendua se kishte plagë nga armë zjarri, por më vonë kjo hipotezë u përjashtua.

Hetuesit po shqyrtojnë mundësinë që Onorato të ketë pasur një takim me dikë në zonën e Via La Malfa. Një dëshmitar raportoi se pak pas orës 15:00 pa dy gra që bërtisnin të dëshpëruara pranë fuoristradës me një derë të hapur. Francesca Donato arriti në vendngjarje pak pas orës 17:00, ku më pas ajo dhe vajza e saj u shoqëruan për t’u marrë në pyetje lidhur me orët e fundit të jetës së Onoratos.

Duke folur me miqtë, zonja Donato përsëriti se nuk besonte në hipotezën e vetëvrasjes, duke thënë: “Angelo nuk e vrau veten”. Në orët e vona të mbrëmjes, hipotezat për ngjarjen mbetën të hapura, përfshirë mundësinë e vrasjes ose vetëvrasjes. Mediat italiane raportojnë se Onorato ka lënë një letër për avokatin e tij.

Francesca Donato, 55 vjeç, është eurodeputete e zgjedhur në vitin 2019 dhe anëtare e grupit të ekstremit të djathtë Identity and Democracy. Ajo është e njohur për pozicionet e saj euroskeptike dhe kundërshtimin e masave kufizuese gjatë pandemisë së Covid-19. Në vitin 2021, ajo u largua nga partia e Matteo Salvinit. Ndërkohë, Onorato kishte tentuar të hynte në politikë në vitin 2022 duke kandiduar për zgjedhjet rajonale siciliane në listën e kristiandemokratëve, por nuk u zgjodh. Miqtë dhe të njohurit që e kishin parë Onoraton deri pak orë para tragjedisë janë të tronditur, pasi ai kishte marrë pjesë në një festë në klubin e tenisit në Palermo mbrëmjen e mëparshme.