Aktorja e njohur Egla Ceno është shpallur fituese e edicionit të tretë të Big Brother Albania VIP, duke u bërë banorja e fundit në shtëpi dhe ajo që fik dritat e famshme të shtëpisë. Pas fitores së Çmimit të Madh prej 100 mijë eurosh, Egla mbërriti në studio ku shprehu emocionet dhe falenderimet e saj.

“Falenderoj që jeni bërë zëri, nga një format kaq i rëndësishëm, që jeni bërë zëri i këtyre mesazheve. Dhe më fal Ledion, të tregoj pak kurrizin,” tha ajo, duke treguar një mesazh të shkruar në bluzën e saj.

Finalistët dhe Shpërblimet

Në vendin e dytë u rendit aktori Julian Deda, i ndjekur nga Romeo Veshaj në vendin e tretë, Heidi Baci në vendin e katërt dhe Meriton Mjekiqi në vendin e pestë. Secili prej tyre u shpërblye me një çek prej 10 mijë eurosh.

“E meritoja,” tha Egla ndër të tjera, duke theksuar se dëshironte shumë që këtë edicion të Big Brother Albania VIP të fitohej nga një grua, në mos ajo, një tjetër grua. Në lidhje me pritshmëritë e karrierës pas kësaj fitoreje, Egla u shpreh:

“Për mua nuk është ky me thënë të drejtën Big Brotheri. Unë karrierën time e kam qëndisur ndër vite dhe do të vazhdoj ta qëndis ashtu ngadalë, sepse jam aktore teatri dhe jam shumë e lidhur me të.”

E pyetur për dedikimin e fitores, Egla tha: “Grave, vetes sime! Doja shumë të ishte një grua, në mos unë një tjetër, por të ishte një grua. Edhe vetes sigurisht, e meritoja! Në fund të ditës e meritoj!”

Fitorja e Eglës në Big Brother Albania VIP 3 është një triumf që reflekton jo vetëm suksesin e saj personal, por edhe një mesazh të fuqishëm për fuqizimin e grave.