Kryetari i PD-së, Lulzim Basha, ka reaguar me një ton ashpër ndaj deklaratave të kryeministrit Rama në Itali, duke e akuzuar atë për përgjegjësi në dështimin e qeverisjes dhe shpopullimin e vendit. Bashkëngjitur me postimin e tij, ai theksoi nevojën për të kthyer fokusin te propozimet politike dhe detyrimin kushtetues për votën e diasporës. Propozimet e PD-së, theksoi Basha, ofrojnë zgjidhje për aspiratat e emigrantëve për të kontribuar në Shqipërinë e përbashkët.

“Koha që cirku dhe ahengu të marrë fund dhe të rikthehemi te propozimet politike. Vota e diasporës, detyrë kushtetuese dhe borxh ndaj bashkatdhetarëve tanë”, shkruan Basha.

Bashkëngjitur postimi i kreut të PD:

Vetëm pellazgët dhe ilirët mbetën pa u fajësuar për korrupsionin e qeverisë së Edi Ramës, për dështimet, për premtimet e pambajtura, për shpopullimin dhe mohimin e të drejtave të atyre që shpërnguli përgjatë qeverisjes së tij nga vendlindja.

Një i papërgjegjshëm që reciton për të vjedhur suksesin e shqiptarëve të ndershëm nëpër botë, për të mbuluar njollat e turpit të pushtetit të tij të korruptuar në çdo qelizë dhe për të fshehur dështimet e qeverisjes së tij, nuk bën gjë tjetër vetëm se shton agoninë e një sistemi të vdekur.