Kryeministri Edi Rama, gjatë fjalës së tij në Kuvend lidhur me projekt-rezolutën kundër korrupsionit, u bëri thirrje opozitës për ta votuar këtë nismë. Rama theksoi se Partia Socialiste (PS) nuk është e lodhur nga pushteti apo vetëkënaqësia, por përkundrazi ka një fuqi të brendshme për të ndryshuar vendin dhe për vetëndryshimin e vazhdueshëm, duke qenë opozitë e vetvetes.

“Siç nuk u ndal reforma në drejtësi, as kjo nuk ndalet. Votoni projekt-rezolutën dhe nëse nuk gjeni forcën, mos bojkotoni komisionin që do të ngrihet menjëherë pas miratimit,” tha Rama.

Rama shpjegoi se PS ka treguar në vazhdimësi se vendimet e saj janë të menduara mirë dhe me qëllim të përmirësimit të situatës në vend. “Jo sepse jam më i zgjuar se ju, por sepse nuk keni dashur kurrë të mësoni se vendimmarrjen me shikimin deri te hunda, rrugën që duket e shkurtër ta bëjnë pafundësisht të gjatë. Ndaj ne jemi këtu e ju aty,” theksoi ai.

Kryeministri përmendi gjithashtu se reformat e nisura 10 vite më parë do të përfundojnë brenda 5 viteve të ardhshme, me një synim të qartë që flamuri shqiptar të vendoset në oborrin e Bashkimit Evropian në Bruksel.

“Me mend në kokë! Keni ende shumë për të parë. Ajo që kemi nisur 10 vite më parë të bitiset 5 vite më pas kur flamuri shqiptar, doni apo jo ju, do ngulet në oborrin e BE në Bruksel,” përfundoi Rama.