Një ngjarje e pazakontë u regjistrua në Urgjencën e spitalit të Durrësit, ku një i ri që po merrte mjekim u sulmua nga tre persona para syve të policisë dhe bluzave të bardha.

I dhunuari është Eridion Cenameti nga Burreli me banim në Durrës. Ai ishte arrestuar dy ditë më parë nga efektivet e Rrugores pasi drejtonte mjetin në gjendje të dehur. Për shkak të konsumimit të tepërt të alkoolit, nuk u dërgua në paraburgim por në urgjencë për të marrë mjekim. Por në dhomën e spitalit, ku ai ruhej me polic, hynë tre persona dhe e goditën me grushte në kokë e fytyrë duke i shkaktuar plagë të shumta.

Agresorët u larguan me shpejtësi, ndërsa i plagosuri në dëshminë për hetuesit tha se ata janë të afërmit e të dashurës së tij, që e kanë kërcënuar edhe më parë. Eridioni i ka thënë hetuesve se agresorët i kanë kërkuar të heqë dorë nga vajza dhe të zhdukej nga Durrësi.

Një ditë pas ngjarjes, të martën e 28 majit 2024, Policia e Durrësit njoftoi se ka arrestuar Benard Kajën, Elton Kaleshin dhe Kledian Lleshin, të tre banues në Durrës, pasi në ambientet e spitalit të Durrësit, kanë kundërshtuar me forcë punonjësit e Policisë dhe kanë goditur me grushte Eridion Cenametin.

Mbi tre personat rëndojnë veprat penale të “kundërshtimit të punonjësve të Policisë së rendit”, “plagosjes së lehtë me dashje” dhe “prishjes së rendit dhe qetësisë publike”.