Dy të rinj nga Shkodra po hetohen në gjendje të lirë, pasi akuzohen për shitje të paautorizuar të kartave SIM dhe falsifikim dokumentesh. E. J., 20 vjeçe, dhe F. Sh., 34 vjeç, të dy banues në Shkodër, dyshohet se kanë shitur karta SIM tek persona me precedentë penalë pa regjistruar të dhënat e tyre ose duke deklaruar informacione të rreme.

Policia e Shkodrës informoi se kartat e shitura në të zezë dhe pa autorizim të kompanive që i disponojnë ato, janë përdorur nga individë të rrezikshëm për të komunikuar për veprimtari kriminale, përfshirë prodhimin e minave me telekomandë dhe kultivimin e bimëve narkotike.

“Dy shtetas iu kanë shitur pa autorizim shtetasve të ndryshëm karta SIM, të cilat dyshohet se janë përdorur nga individë me precedent kriminal për të komunikuar për veprimtari kriminale në fushën e prodhimit të minave me telekomandë, për kultivimin e bimëve narkotike dhe për veprimtari të tjera kriminale,” informoi policia e Shkodrës.

Policia sekuestroi 79 formularë për shitjen e kartave SIM me të dhëna të falsifikuara. Sipas ligjit, çdo numër celulari duhet të regjistrohet me të dhënat personale të blerësit.

Dy të rinjtë janë proceduar penalisht për veprat penale “Shitja e paautorizuar e kartave SIM” dhe “Falsifikimi i dokumenteve”. Hetimet vazhdojnë për të zbuluar përmasat e aktivitetit të tyre dhe lidhjet e mundshme me grupet kriminale.