Drejtori i Policisë së Tiranës, Tonin Vocaj, dhe zv.drejtori Alket Shatro vizituan këtë mëngjes avokatin Sokol Mëngjesi në spitalin e Traumës. Mëngjesi u dhunua rëndë më 29 maj për shkak të detyrës dhe gjendja e tij shëndetësore mbetet kritike.
Kreu i Partisë së Lirisë, Ilir Meta, dënoi sulmin ndaj avokatit duke e cilësuar një akt kriminal. Meta theksoi se banditët trimërohen për shkak se shteti është nën kontrollin e një kryehorri, duke iu referuar kryeministrit Edi Rama. “Një akt kriminal, akt i qëllimshëm. Nuk ka asnjë justifikim, dihet nga vjen trimërimi i këtyre horrave dhe banditave. Nga fakti që shteti është kapur nga një kryehorr”, deklaroi Meta.
Nesër pritet të dalë para gjykatës Dritan Nano, i cili është arrestuar si organizatori i dhunës barbare ndaj avokatit. Sokol Mëngjesi mbetet ende në koma në spital. Bashkë me Nanon, për masë sigurie del dhe dhëndri i tij, Dorian Alia, i cili është një nga dhunuesit. Tre persona të tjerë janë ende në kërkim.
Sipas hetimeve, avokati Mëngjesi u sulmua mëngjesin e 29 majit sapo la djalin në kopsht në zonën e ish-bllokut. Dorian Alia, 32-vjeç, u vetëdorëzua pas ngjarjes së rëndë dhe dha dëshmi që faktoi dyshimet e policisë se pas dhunës fshihet Dritan Nano. Nano, 58-vjeç, nuk pranonte të likuidonte avokatin sipas kontratës që kishin firmosur, pasi Mëngjesi fitoi gjyqin për pronën e një familje me tetë trashëgimtarë, ku sot janë ndërtuar kulla te Diga e Liqenit.
