Ministri i Drejtësisë, Ulsi Manja, akuzoi opozitën se ka sponsorizuar shkrime në media ndërkombëtare, si RAI 3 dhe Bild, për të sulmuar qeverinë e kryeministrit Edi Rama. Gjatë një replike me deputetin Edmond Spaho, Manja theksoi se akuzat e publikuara janë të pabazuara dhe kanë për qëllim diskreditimin e qeverisjes socialiste.

“Si ka mundësi që Shqipëria sot është në zenitin e marrëdhënieve të mira ndërkombëtare dhe Europiane dhe shumë shpejt presim të shkojmë në stacionin ku na takon të shkojmë?” pyeti Manja, duke vënë në dyshim vërtetësinë e akuzave të mediave të huaja. “Ore çfarë ka thënë RAI? Se dëgjova që ti merresh edhe me këto mediat se ke kohë të lirë tani… ‘BILD’, RAI, ku e di unë çfarë… Washington…’”

Manja i quajti të pa baza akuzat e RAI dhe Bild, duke pretenduar se ato janë paguar nga opozita për të krijuar një imazh negativ për Shqipërinë dhe qeverinë. “Edmond, më fal, por çfarë kanë thënë këto mediat që nuk e thotë Saliu përditë nga ballkoni dhe nuk e thua ti çdo ditë të enjte këtu? Po edhe atje ka media si këto këtu që i paguani, i paguani edhe atje. Kjo është bota e teknologjisë tani.”

Ministri i Drejtësisë vuri theksin në reputacionin e mirë të Shqipërisë në marrëdhëniet ndërkombëtare dhe evropiane dhe kundërshtoi me forcë etiketimin e Shqipërisë si “narko-shtet.” Ai tha: “Shqiptarët shohin realitet tjetër. Edi Ramën nuk e rrëzoni me këtë retorikë, është turp të etiketoni Shqipërinë që e kemi amanet si narko-shtet.”

Në përgjigje të akuzave për lidhje të qeverisë me krimin, Manja mbrojti qeverinë dhe kryetaren e Kuvendit, duke deklaruar: “Ne nuk jemi të lidhur me krimin. Ju na akuzoni për mushkonja, avionë droge, hidhni akuza për trafikim lëndësh narkotike, mendoj se ato nuk ekzistojnë por ju ka bërë dëm vaksina. Unë nuk e pranoj që jetojmë në një narko-shtet.”