Agjencia e Mbikëqyrjes Policore (AMP) ka ekzekutuar vendimin e Gjykatës për pezullimin e një punonjësi policie në Komisariatin e Policisë Nr. 4 Tiranë, i dyshuar për “Shpërdorim detyre”.

AMP Rajoni Tiranë, pas hetimeve të thelluara dhe referimit të materialeve procedurale në Prokurorinë pranë Gjykatës së Shkallës së Parë Tiranë, ka ekzekutuar masën e sigurimit personal me karakter ndalues “Pezullim i ushtrimit të një detyre a shërbimi publik”. Vendimi është marrë nga Gjykata e Shkallës së Parë të Juridiksionit të Përgjithshëm Tiranë ndaj punonjësit të policisë E.D., 38 vjeç, me detyrë Nd/Specialist i Policimit në Komunitet në Komisariatin e Policisë Nr. 4 Tiranë.

Punonjësi i policisë dyshohet për kryerjen e veprës penale “Shpërdorim detyre” pas hetimeve që siguruan prova dhe fakte të bazuara. Hetimet tregojnë se gjatë një operacioni të zhvilluar nga Komisariati i Policisë Nr. 4 Tiranë më 11 qershor 2024, për identifikimin dhe kapjen e autorëve që posedonin një parcelë ku kultivohej lëndë narkotike, E.D. ka shfrytëzuar informacionin që kishte për shkak të detyrës për të njoftuar një prej autorëve, me të cilin kishte lidhje të afërta familjare, me qëllim shmangien nga përgjegjësia penale.

Hetimet vijojnë për dokumentimin e plotë me prova ligjore të veprimtarisë së dyshuar.