Një ngjarje tronditëse ka ndodhur në Fano (Pesaro), ku një burrë dhe gruaja e tij janë gjetur të vrarë në banesën e tyre. Viktimat janë Giuseppe Ricci, 75 vjeç, dhe Luisa Marconi, 70 vjeç. Ricci dyshohet se është goditur në kokë me një mjet të fortë, që i ka dëmtuar kafkën, ndërsa bashkëshortja e tij është mbytur.

Alarmi për vdekjen e të moshuarve është dhënë nga djali i tyre, Luca, i cili jeton një kat më lart nga banesa ku u gjetën pa shenja jete prindërit e tij. Luca është marrë në pyetje nga policia, teksa hetuesit po përpiqen të zbardhin motivet e krimit.

Sipas burimeve, Giuseppe dhe Luisa duhej të largoheshin nga shtëpia e tyre prej 75 metrash katrorë po atë ditë, pasi prona ishte shitur në ankand për rreth 60 mijë euro për të mbuluar borxhet e djalit të tyre 40-vjeçar, Luca. Ky detaj po konsiderohet si një element i rëndësishëm në hetimin e kësaj tragjedie.