Kryetari i Partisë Demokratike, Sali Berisha, deklaroi se duhet të bëhet gjithçka për të mirëpritur në shtëpinë e tyre të gjithë ata demokratë që e ndjejnë veten të tillë dhe duan të bashkohen me PD-në. Në një mesazh gjatë mbledhjes së Kryesisë së PD-së, e cila po zhvillohet në selinë e kësaj partie, Berisha theksoi se askush nuk duhet të shikojë me skepticizëm ata që duan të bashkohen me partinë.

“Armiku ynë i përbashkët është Edi Rama. PD ka nevojë jo vetëm të bashkohet me të gjithë anëtarët dhe mbështetësit e saj, por ka nevojë të bashkohet më shumë se kurrë me të gjithë spektrin opozitar,” tha Berisha. Ai theksoi se një front i gjerë dhe i bashkuar opozitar është i një rëndësie vendimtare. Berisha argumentoi se Edi Rama është në pushtet dhe dhunon çdo ligj e Kushtetutë të vendit, edhe për shkak se opozita e lejon atë.

Berisha deklaroi se regjimi i Edi Ramës duhet luftuar nga të gjithë shqiptarët, duke shtuar se të tre drejtuesit e partive opozitare janë në hetim nga SPAK. Ai përmendi skandalet e qeverisë, duke pyetur: “Ku jemi ne? Cila është detyra jonë?” Sipas Berishës, detyra e opozitës është krijimi i Qeverisë teknike dhe shpëtimi i vendit nga ky regjim. Ai argumentoi se Qeveria teknike është e pashmangshme pasi Edi Rama ka humbur legjitimitetin, duke dëshmuar në zgjedhjet e 14 majit se është i gatshëm të shkelë çdo ligj, normë, moral dhe Kushtetutë.

“Ai qëndron në pushtet për shkak të dobësisë së opozitës, ndaj ne duhet t’ia bëjmë të qartë mbështetësve tanë,” përfundoi Berisha.