Dy shtetas të cilët kishin mbetur në det pasi mjeti lundrues i tyre, një skaf, kishte pësuar defekt në Karaburun, u shpëtuan nga Policia Kufitare e Vlorës dhe Delta Force. Pas dhënies së ndihmës, verifikimi tregoi se drejtuesi i skafit nuk dispononte dokumentacionin e duhur në bordin e mjetit, për çka u ndëshkua me një masë administrative prej 10,000 lekë.

Shërbimet e Policisë Kufitare shoqëruan skafin dhe shtetasit në bordin e tij në SPK Triport. Kontrollet e mëtejshme nga Seksioni i Hetimit dhe ZMPKT nuk zbuluan sende të kundërligjshme në bord.

Policia Kufitare thekson angazhimin e saj maksimal për të garantuar sigurinë e qytetarëve, vizitorëve dhe turistëve, duke i ftuar të denoncojnë çdo rast të paligjshmërisë në numrin 112 dhe në Komisariatin Dixhital.