Një shpërthim i fuqishëm ndodhi mbrëmjen e djeshme rreth 100 metra larg Portit Detar në Sarandë, i cili dyshohet të jetë shkaktuar nga një eksploziv. Polumbarët, duke kërkuar në thellësinë e detit pranë vendit të ngjarjes, kanë gjetur copa metalike që mendohet se i përkasin një mjeti lundrues ku mund të ketë qenë viktima. Megjithatë, ende nuk është përcaktuar saktësisht lloji i mjetit lundrues.

Dyshimet lidhur me ngjarjen janë ngritur pasi besohet se viktima ndodhej në një mjet të vogël dhe ndoshta artizanal lundrues afër Portit Detar. Shpërthimi ka ndodhur mbi sipërfaqen e ujit, dhe forca e shpërthimit ka bërë që ekspertët të mendojnë për përdorimin e eksplozivit. Ngjarja ka ndodhur rreth orës 22:00, gjatë ndeshjes Shqipëri – Spanjë, kur vëmendja e publikut ishte në ndeshje.

Sipas burimeve konfidenciale, viktima është parë nga dy të huaj që po lundronin me një gomone të vogël drejt jahtit të tyre të ankoruar. Ata e kanë pyetur nëse kishte problem, por viktima u përgjigj “Jo”. Pak sekonda më pas u dëgjua shpërthimi, i cili u shoqërua me zjarr, tym dhe zhurmë, duke tronditur gjithë qytetin.

Megjithëse viktima ende nuk është identifikuar, burime të besueshme kanë konfirmuar se ai është shtetas shqiptar dhe jo i huaj, siç u mendua fillimisht. Autoritetet vazhdojnë hetimet për të zbardhur rrethanat e ngjarjes dhe për të identifikuar përgjegjësit e mundshëm.