Një gazetar i njohur është arrestuar në Greqi pasi akuzohet se ka dhunuar barbarisht partneren e tij, gjithashtu kolege në fushën e gazetarisë. Mediat fqinje raportojnë se gazetari i ERT-së është kapur nga policia në zonën e Pireut, pasi ka ushtruar dhunë fizike dhe psikologjike ndaj saj.

Partnerja e tij ka denoncuar se ka qenë viktimë e rrahjeve të ashpra pasi ka kërkuar të ndahen, duke pësuar lëndime të rënda, përfshirë frakturë në fytyrë. Ajo ka paraqitur një padi në Departamentin për Ballafaqim me Dhunën në Familje në Omonia.

Reagimi i ERT-së ka qenë i menjëhershëm, duke pezulluar kontratën e gazetarit deri në zbardhjen e çështjes në drejtësi. Gazetari pritet të dalë para prokurorit mëngjesin e së mërkurës për t’u përballur me akuzat.

ERT ka lëshuar një njoftim zyrtar ku konfirmon pezullimin e tij nga detyra: “Sapo ERT u informua për një incident të dhunës në familje nga një punonjës me kontratë në ERT ndaj partnerit të tij, gjithashtu punonjës me kontratë në kompani, i pezulloi kontratën autorit të dyshuar deri në zbardhjen e çështjes dhe vendosjen e drejtësisë.”

Emri i gazetarit nuk është bërë ende i ditur në media.