Mediat greke kanë zbuluar detaje të reja nga vrasja e shqiptarit Alfons Doçi në burgun grek të Koridhalos. 35-vjeçari, i dënuar përjetë për një vrasje të dyfishtë, u godit me thikë nga Xhilian Halili, shoku i tij i qelisë, një shqiptar me të cilin kishte pasur një njohje të vjetër.
Të dy së bashku u arratisën në vitin 2018 gjatë transportimit nga një burg në tjetrin. Arratia zgjati vetëm 48 orë, pasi u vunë sërish në pranga nga policia greke. Sipas hetimeve, sherri mes dy shqiptarëve nisi për shkak të një mosmarrëveshjeje mbi temperaturën e kondicionerit. Fjalët e ashpra që shkëmbyen me njëri-tjetrin u shndërruan në grushte. Në një moment, 42-vjeçari me nofkën “Niko” rrëmbeu një thikë kuzhine dhe goditi Alfons Doçin disa herë.
Nga përleshja u plagos edhe një i dënuar tjetër, Altin Vokrri nga Gjakova e Kosovës. Ai mori një goditje në shpatull dhe ndodhet në spital jashtë rrezikut për jetën. Zyrtarët e burgut gjetën edhe armën e krimit, thikën e kuzhinës me të cilën u krye vrasja.
Viktima Alfons Doçi ishte i dënuar për dy vrasje. Në vitin 2017, ai vrau një biznesmen në Atikën Perëndimore gjatë një grabitjeje. Pak kohë më vonë, ai vrau një grua gjatë një tjetër grabitjeje. Edhe autori, Xhilian Halili, është i dënuar për vrasjen e një shqiptari në 2011-ën në Peloponez, vrasje e porositur nga një kriminel grek. Viktima ndodhej në shoqërinë e djalit të tij, 2-vjeçar, por Halili nuk nguroi ta qëllonte me thikë në fyt, duke i marrë jetën.
