Ministri i Brendshëm, Taulant Balla, ka reaguar lidhur me vendimin e Agjencisë së Mbikëqyrjes Policore (AMP) për pezullimin nga detyra të 19 punonjësve të Policisë së Shtetit.
Balla deklaroi se procesi i vetëpastrimit të Policisë së Shtetit po vijon.
“19 punonjës të Policisë Kufitare janë pezulluar sot, pas një hetimi të gjatë të Agjencisë së Mbikëqyrjes Policore në bashkëpunim me Prokurorinë e Jurisdiksionit të Përgjithshëm Korçë. E përgëzoj Agjencinë e Mbikëqyrjes Policore për punën profesionale dhe nxis hetime të ngjashme në të gjithë territorin. Vetëpastrimi i radhëve të Policisë dhe rritja e integritetit të organizatës forcojnë besimin e partnerëve dhe të publikut, duke garantuar më shumë siguri dhe shërbime më të mira për qytetarët,” shkroi Balla.
