Agjencitë britanike të lajmeve dhe kanalet televizive nuk do të publikojnë artikuj apo kronika mbi zhvillimet politike sot për shkak të zgjedhjeve në Mbretërinë e Bashkuar.

Vendvotimet u hapën në orën 7:00 të mëngjesit dhe do të mbyllen në orën 22:00, kur exit poll-et do të japin një tregues të rezultatit përfundimtar. Rregullat e Ofcom, rregullatorit të transmetimit në MB, ndalojnë publikimin e sondazheve të opinionit gjatë ditës së votimit dhe klasifikojnë si veprë penale publikimin e parashikimeve të sondazheve kur votimi është në progres.

Gazetaria e shkruar, megjithatë, ka rregulla të ndryshme që e lejojnë publikimin e përmbajtjeve zgjedhore në faqet e tyre, duke përfshirë gazetat dhe revistat, pasi këto mund të dalin për t’u botuar gjatë natës dhe të jenë të disponueshme për lexuesit në ditën e votimit.