Pas një viti kundërshtish gjyqësore nga Rajmonda Nika, bashkëshortja e të ndjerit Aleks Nika, Prokuroria e Posaçme (SPAK) iu bind Gjykatës së Lartë dhe regjistroi çështjen e “21 Janarit”. Megjithëse në denoncim përmenden ish-kryeministri Sali Berisha, ish-ministri i Brendshëm Lulzim Basha dhe ish-komandanti i Gardës Ndrea Prendi, SPAK e regjistroi çështjen pa emrat e tyre.
Në njoftimin për shtyp, SPAK zbuloi dje se e regjistroi procedimin për vrasje në rrethana cilësuese, shpërdorim detyre në bashkëpunim dhe veprime që pengojnë zbulimin e të vërtetës, pasi siç shton Prokuroria e Posaçme, dyshohet se mund të jenë kryer nga ish-funksionarë të lartë shtetërorë gjatë ushtrimit të detyrës. Ashtu siç e urdhëron Gjykata e Lartë, SPAK deklarohet kompetent për këto hetime dhe kërkon të tërheqë fashikujt e “21 Janarit” pranë Prokurorisë së Tiranës për të zbuluar vrasësit e Aleks Nikës.
Reagon Lulzim Basha
Ndërkohë, Lulzim Basha, asokohe ministër i Brendshëm, reagoi dje për këtë çështje gjatë një konference për mediat. I pyetur lidhur me hetimin e SPAK për këtë çështje, zoti Basha theksoi se është i gatshëm dhe në dispozicion të drejtësisë për zbardhjen e të vërtetës. “Të hetojë gjithçka, në mënyrë të paanshme. Ky ka qenë mesazhi im në 13 vite. Ky mbetet mesazhi im. Kam qenë dhe mbetem në dispozicion të çdo akti të drejtësisë për të bërë zbardhjen e plotë dhe drejtësinë për ’21 Janarin’”, deklaroi Basha, duke hequr përgjegjësinë nga vetja dhe lënë të nënkuptohet se llogari për këtë ngjarje duhet të japë ish-kryeministri Sali Berisha.
Po ashtu, i pyetur nëse si ministër i Brendshëm ka dhënë urdhër që qytetarët të qëllohen, Basha e mohoi këtë, duke theksuar se nuk ka dhënë urdhër për fshirjen e serverëve dhe duke ia faturuar të gjitha përgjegjësitë Sali Berishës. “Jo dhe jo“, deklaroi Basha para gazetarëve. I pyetur për rolin e kryeministrit Berisha në atë ngjarje, Basha deklaroi se këto punë i duhen lënë SPAK dhe GJKKO. “Kjo është konferencë për shtyp, nuk është GJKKO as SPAK, të lëmë SPAK dhe GJKKO të bëjnë punën e vet”, theksoi ai.
Akuzat ndaj Kryeministrit Rama
Më tej, Basha përqendroi akuzat ndaj kryeministrit Rama, duke thënë se ai ka shpërblyer gardistët e “21 Janarit”. “Çfarë informacionesh dhe të dhënash kam patur, i kam bërë publike, mbetem në dispozicion me çfarë kam dhe di. Ka tre dimensione: dimensioni njerëzor, 4 jetë njerëzish të pafajshëm është një tragjedi që duhet të marrë përgjigje. Dimensioni njerëzor, të hetohet gjithçka nga fillimi deri në fund. Dimensioni politik, pushkatarët që akuzon Rama i bëri kryetar PS, kryetar bashkie i pasuroi. Personi që e bëri në fillim aleat, kryetar kuvendi dhe president. Shqiptarët e kuptojnë që ’21 Janari’ ka edhe dimensionin e dhimbshëm politik”, nënvizoi Basha.
