Temperaturat e larta të këtyre ditëve kanë shkaktuar një rritje të ndjeshme të rasteve me viroza në spitalin rajonal të qytetit të Kukësit. Përveç virozave, rreziku për helmim nga ushqimet është gjithashtu më i lartë. Shefi i urgjencës, Emin Ferati, raportoi se këto ditë kanë pasur shumë raste të ndryshme të lidhura me temperaturat e larta.

“Temperaturat e larta shkaktojnë kontaminimin e ushqimeve me mikrobe, prandaj rekomandohet konsumimi i ushqimeve të freskëta. Ndërkohë, temperaturat e larta përbëjnë një rrezik për shëndetin e popullatës, dhe bëjmë thirrje që të kenë kujdes dhe të mos ekspozohen në orët e pikut. Moshat e dyta dhe të treta, sidomos ato me sëmundje kronike, janë më të prekshme,” u shpreh mjeku Emin Ferati.

Ai gjithashtu dha disa këshilla për përballimin e temperaturave të larta, veçanërisht për moshat e treta.

“Të konsumojnë ushqime sa më të freskëta, të pinë shumë lëngje dhe të marrin në mënyrë sistematike mjekimin që kanë për sëmundjet kronike,” shtoi Ferati.

Në 24 orët e fundit, në spitalin rajonal të Kukësit janë paraqitur rreth 80 raste me simptoma të ndryshme, duke përfshirë viroza dhe helmime nga ushqimet.