Në një tubim qytetar të mbajtur ditën e sotme, kryetari i Partisë Demokratike, Sali Berisha, ka përgëzuar banorët dhe protestuesit e Mamurrasit për protestën e tyre në autostradën Thumanë-Kashar, ku ata shprehen pakënaqësinë e tyre për mungesën e hyrje-daljeve në këtë aks rrugor. Berisha i përshkroi protestuesit si individë që “u përballën dhëmb për dhëmb me falangat e narkoshtetit”.

Berisha i ka bërë thirrje qytetarëve nga veriu i Shqipërisë që të ngrihen në mosbindje civile, duke kërkuar që të heqin të gjitha vendpagesat e vendosura nga qeveria e Edi Ramës, përfshirë ato në ‘Rrugën e Kombit’ dhe në autostradën Thumanë-Kashar. “U bëj thirrje qytetarëve nga Fushë Kruja në Vermosh t’i fshijnë nga faqja e dheut të gjitha vendpagesat për kalimin në rrugë”, tha Berisha.

Gjatë fjalës së tij, Berisha ka hedhur akuza të forta ndaj kryeministrit Edi Rama, duke përmendur vendimet e Gjykatës Kushtetuese për Teatrin Kombëtar dhe mandatin e Olta Xhaçkës. Sipas Berishës, Rama po i injoron qëllimisht këto vendime, duke shtuar se qeveria është e mbushur me narkoeuro. “Ligji tashmë është në duart e bandave kriminale”, tha Berisha, duke theksuar se përmbysja e kësaj narkodiktature është një mision i shenjtë dhe vendimtar për ekzistencën e Partisë Demokratike.

Në fund të fjalës së tij, Berisha theksoi se beteja e opozitës nuk është për një grusht mandatesh deputetësh, por për rikthimin e votës së lirë dhe për rotacionin politik. “Beteja jonë nuk është kurrë për një grusht mandatesh! Beteja jonë është për rikthimin e votës së lirë dhe rotacionin politik”, përfundoi Berisha në tubimin qytetar.