Një incident i rëndë ndodhi në Parlamentin Turk gjatë debatit mbi një projektligj tatimor, ku deputetë të partisë në pushtet për Drejtësi dhe Zhvillim dhe ata të partisë pro-kurde u përfshinë në një sherr fizik.

Deputeti Ali Bozan i partisë pro-kurde e quajti ish-ministrin e Transportit Adil Karajmailoglu një “hajdut”, çka shkaktoi një përplasje të fortë. Karajmailoglu u largua nga seanca, u kthye dhe goditi Bozanin me shuplakë e më pas me grusht. Bozan e ktheu goditjet, dhe situata rrezikonte të përkeqësohej më shumë nëse nuk do të ndërhynin kolegët e deputetëve për të qetësuar gjendjen.

Debati fillimisht kishte të bënte me një projektligj tatimor dhe Bozan, gjatë fjalës së tij, sulmoi qeverinë, duke akuzuar Partinë për Drejtësi dhe Zhvillim për vjedhje nga xhepat e punëtorëve, nëpunësve dhe pensionistëve. Pas incidentit, nënkryetari i Kuvendit kërkoi një pushim prej 15 minutash për të qetësuar situatën.