Policia e Kosovës ka arrestuar të mërkurën Dushan Drobacin, i dyshuar për sulmin ndaj pjesëtarëve të misionit të NATO-s, KFOR, në Zveçan në maj të vitit të kaluar. Sulmi kishte ndodhur pasi serbët lokalë kundërshtuan hyrjen e kryetarëve të rinj shqiptarë në ndërtesat komunale në Zveçan, Leposaviq dhe Zubin Potok, komuna në veri të Kosovës të banuara me shumicë serbe.

Si pasojë e dhunës, 93 pjesëtarë të KFOR-it ishin plagosur, disa prej tyre rëndë. Drobaci është i dyshuar për katër vepra penale: bashkim për veprimtari kundërkushtetuese, rrezikim të personave nën mbrojtje ndërkombëtare, pjesëmarrje në turmë që kreu vepër penale dhe sulm ndaj personit zyrtar.

Kosova ka akuzuar Serbinë për ngjarjet në Zveçan, duke thënë se ato janë kryer nga “grupe kriminale të afërta me presidentin e Serbisë, Aleksandar Vuçiq”, ndërsa Serbia e ka mohuar këtë akuzë dhe ka akuzuar kryeministrin e Kosovës, Albin Kurti, për nxitjen e tensioneve.

Derisa KFOR-i ka kërkuar që të mbahen përgjegjës të përfshirët në sulm, deri më tani janë arrestuar dhjetë persona për dhunën në protesta dhe për sulmet ndaj pjesëtarëve të KFOR-it. Në Kosovë aktualisht ndodhen 4.700 pjesëtarë të KFOR-it, që është përgjegjës i tretë për sigurinë e Kosovës, pas Policisë së Kosovës dhe misionit të Bashkimit Evropian për sundimin e ligjit, EULEX.