Një shpërthim është regjistruar në orët e para të mëngjesit të kësaj të diele pranë një banese në Shkodër. Incidenti ndodhi rreth orës 03:36, në lagjen “Mark Lula”, pranë derës së banesës së shtetasit R. G.

Policia raportoi se shpërthimi, i shkaktuar nga një sasi e vogël lënde plasëse, ka shkaktuar vetëm dëme materiale dhe nuk ka pasur viktima apo të lënduar.

Njoftimi i Policisë

“Rreth orës 03:36, në lagjen “Mark Lula”, Shkodër, pranë derës së banesës së shtetasit R. G., është hedhur një sasi e vogël dyshohet lëndë plasëse duke shkaktuar vetëm dëme materiale. Menjëherë në vendngjarje kanë shkuar forcat e Policisë të cilat vijojnë kontrollin në zonë.”

Grupi hetimor, nën drejtimin e Prokurorisë, është duke kryer veprime për sigurimin e provave me qëllim identifikimin dhe kapjen e autorit/ve të ngjarjes.