Kryeministri Edi Rama, gjatë fjalës së tij në Kongresin e Partisë Socialiste, nuk i kurseu batutat me deputetin Pandeli Majko, duke e cilësuar atë si “i vetmi i pavdekshëm” në parti.

Teksa parashikoi të ardhmen politike të Helenës nga Akademia Politike, Rama tha se një ditë ajo do të udhëheqë PS-në, ndoshta kur ai vetë të mos jetë më në këtë botë. Ai shtoi se Pandeli Majko do të jetë dëshmitar i kësaj ngjarjeje.

“Po ja lejon vetes një parashikim që koha do ta tregojë, mbase kur unë nuk do jem më dëshmitar i kësaj bote. Ti Helena një ditë me shumë gjasë do jesh këtu ku jam unë, udhëheqëse e PS-së. Me këtë që të thashë sapo ta kam hapur një problem. Sepse t’i hyre e panjohur dhe e buzëqeshur, por kur të dalësh do të kesh sy që nuk do të shikojnë me dashamirësi. Këtë konsideroje si një favor, meqë the që s’ke pasur asnjëherë një favor, sepse kush nuk ka shumë kundërshtarë nuk ngjitet dot në majë,” tha Rama.

Rama theksoi se Majko do të jetë dëshmitar i kësaj ngjarjeje kur Helena të bëhet kryetare e partisë, dhe se ai do ta kujtojë këtë parashikim përpara gjeneratës së re.

“Do kem dëshmitar Pandi Majko, kur mos jem më, se Pandi është i vetmi i pavdekshëm që kemi këtu dhe kur Helena të bëhet kryetare e partisë, Pandi do të dëshmojë para gjeneratës X, që ‘e ka thënë dikur njëri nga ata, me duket se ishte Edi Rama’, se kushedi sa do ketë përcjellë në Sharrë apo Tufinë, se është edhe mik me Lalin Erin dhe ia gjen varret aty ku do,” përfundoi Rama.