Gjatë fjalës së tij në Kongresin e Partisë Socialiste, Kryeministri Edi Rama theksoi se në mandatin e katërt do të kurorëzojnë arritjet me organizimin e Samitit të NATO-s në Tiranë, për të cilin kanë vendosur kandidaturën.

Rama u shpreh se për të arritur këtë, do të angazhohen maksimalisht dhe do të bindin aleatët se Shqipëria është vendi më i mirë për këtë event. Me ironi, ai shtoi se nuk do t’i çojë delegatët në Vlorë, për shkak të çmimeve të larta gjatë sezonit turistik.

“Do të hapim vitin e ardhshëm edhe Aeroportin Ndërkombëtar të Vlorës. Do t’ia sjellim vlonjatëve turistët edhe me avion, që t’ia vënë çmimin e taksisë nga Aeroporti në Vlorë më shumë se çmimi i biletës nga Londra në Vlorë. Vlonjatët, nuk ke çfarë t’u bësh. Ne shkojmë përpara, por ata shkojnë edhe më përpara, ndaj ndonjëherë mbeten dhe thonë ‘ku vajtën’,” tha Rama.

Ai theksoi se synojnë të vendosin qershinë mbi tortë në mandatin e katërt dhe të mirëpresin Samitin e NATO-s në vitin 2027. “Do t’i qepemi dhe do t’i bindim që s’ka më mirë se Shqipëria. Do t’i garantojmë që nuk do t’i çojmë në Vlorë për të ngrënë, se nuk po i bëj antireklamë Vlorës, se gatuajnë shumë mirë, por më kanë mërzitur me ato çmimet,” përfundoi Rama.