Autoriteti Portual Durrës ka hapur këtë të martë procedurën për ndërtimin e fazës së parë të “Portit të Ri Tregtar të Integruar të Durrësit në Porto Romano”. Ky projekt ka një fond limit prej 39.3 miliardë lekësh, që përkthehet në rreth 390 milionë euro.
Faza e parë e punimeve do të zgjasë 1220 ditë, ose rreth 3.5 vite, dhe përfshin një sërë punimesh të rëndësishme. Fusha e punës për kontratën përfshin:
– Kanalet e afrimit, portin e jashtëm, duke përfshirë zonën e kthimit dhe manovrimit të anijeve, dhe pellgun e portit lindor, si dhe ndarësin me ujin në pjesën veriore.
– Rehabilitimi dhe zgjerimi i ndarësit ujor jugor.
– Shpatet e rikuperuara rreth basenit të portit lindor.
– Mbushja e tokës për zhvillimin e terminalit duke përdorur materiale të përshtatshme mbushëse dhe punimet e përmirësimit të tokës, përfshirë kolona guri dhe ngarkim paraprak.
– Ndihmë për navigimin.
– Ndërtesat, përfshirë ndërtesën e administratës dhe ndërtesat e zonës para portës.
– Drenazhimi i ujërave të stuhive, furnizimi me ujë të pijshëm dhe furnizimi me ujë kundër zjarrit, së bashku me stacionet e depozitimit dhe pompimit përkatëse, furnizimi me energji në tension të mesëm për ndërtesat, ndriçimi i rrugëve dhe rrethimit, lidhja me një nënstacion kryesor që do të ndërtohet nga të tjerët, komunikimet e të dhënave dhe atyre zanore, rrethimi dhe porta kryesore, së bashku me sigurinë përkatëse.
### Porti i Durrësit me Fonde Buxhetore dhe PPP
Qeveria ka zgjedhur modelin C2 për zhvillimin e Portit të Ri në Porto Romano, i cili parashikon një port që zhvillohet në breg, ndryshe nga modeli C1 që parashikonte zhvillimin në det. Ky projekt do të kërkojë angazhimin e fondeve buxhetore, fondeve të Autoritetit Portual, granteve, si dhe sektorit privat përmes partneriteteve publike-private (PPP). Rreth 46% e financimit do të sigurohet nga qeveria dhe 54% nga sektori privat.
### Projekti i Durrës Marina & Yachts
Në dhjetor 2020, një marrëveshje bashkëpunimi mes qeverisë shqiptare dhe Emirateve të Bashkuara u miratua nga Kuvendi, duke përfshirë rizhvillimin e Portit të Durrësit, investimet në turizëm, bujqësi dhe logjistikë në Vlorë, Sarandë dhe Ksamil, dhe investimet në turizëm në Përmet. Në vitin 2021, u njoftua se kompania EMAAR, e njohur për transformimin e Dubait, do të zbatojë projektin e Durrësit.
Në vitin 2022, kompania zhvilluese nisi shitjen e apartamenteve që do të ndërtohen në disa faza. Gjatë vitit 2024, u njoftua hapja tjetër e shitjeve më 8 mars përmes prenotimeve për apartamentet në rezidencën “ParkView”, që përfshin 233 apartamente me 1, 2 ose 3 dhoma gjumi.
