Deputetja e opozitës, Andia Ulliri, adresoi mediat pas përfundimit të seancës plenare ku u miratuan ministrat e rinj dhe kryetarja e re e parlamentit. Ulliri shprehu shqetësimet e banorëve të Krujës dhe Fushë Krujës në lidhje me ndërtimin e aksit Thumanë-Kashar, gjatë një diskutimi me kryeministrin.

“Ne protestojmë për aksin Thumanë-Kashar, pasi qeveria nuk ka garantuar hyrje-daljet për banorët. Janë shkelur të drejtat e qytetarëve; 85 mijë banorë të Krujës dhe Fushë Krujës nuk kanë hyrje-dalje. Kanë protestuar për dy vite dhe unë kam qenë me banorët e Bërxullës. Nuk ka pasur përgjigje nga ARRSH për devijimin e rrugës. Vendosa t’i adresoj kryeministrit shqetësimin dhe ai nuk kishte asnjë përgjigje, më referoi te institucionet që nuk kanë kthyer asnjë përgjigje, jo vetëm mua,” tha Ulliri.

Ajo theksoi se kryeministri mendon se referimi te Ministria e Infrastrukturës mund të japë një përgjigje për një çështje që është detyrim ligjor, ndërkohë që banorët janë në rrugë. Ulliri gjithashtu denoncoi reagimet e policisë, duke i marrë banorët gjatë natës për t’i çuar në komisariat.

“I bëj thirrje policisë të heqë dorë nga dhuna. Ky është penalizimi jo vetëm për banorët e Krujës dhe Fushë Krujës, por edhe për gjithë banorët e veriut. Si mundem unë, një banore e Niklës, të hyj në Thumanë-Kashar?” përfundoi ajo.