Trupi i Gianfranco Bonzi është gjetur në lumin Adda në veri të Italisë, pas disa muajsh kërkimesh dhe shpalljesh si i zhdukur. Policia italiane ka nisur një hetim për të zbardhur rrethanat e vdekjes së tij dhe për të hetuar nëse ai ka rënë viktimë e një mashtrimi online për para.

59-vjeçari, i cili punonte si administrator pallati, kishte humbur kontaktin në Milano pesë muaj më parë. Trupi i tij, i gjetur muajin që shkoi në lumin Adda, është konfirmuar nga analizat si i njëjti person i zhdukur. Para zhdukjes, Bonzi kishte bërë një postim në rrjetet sociale ku shprehte një zhgënjim romantik, duke shkruar: “Ky është postimi im i fundit dhe një nga veprimet e fundit të jetës time. Arsyeja është një zhgënjim romantik që nuk mund të përballoja.”

Policia beson se Bonzi ishte mashtruar online nga një individ që pretendonte se ishte këngëtarja Dua Lipa. Raportimet sugjerojnë se mashtruesi kishte krijuar një profil të rremë dhe kishte përdorur këtë identitet për të kërkuar para nga Bonzi, të cilin ai i kishte dërguar për të mbështetur një marrëdhënie të rreme.

Një i njohur i Bonzi ka thënë për mediat lokale se ai kishte bërë dy tërheqje bankare prej rreth 2,500 euro secila dhe i kishte dërguar ato para “këngëtares” e cila e quante veten si “dashuria ime”. I njohuri përmendi se Bonzi ndjehej thellësisht i tradhtuar dhe i zemëruar kur mori vesh për mashtrimin. Policia dyshon se vdekja e Bonzi mund të ketë qenë një vetëvrasje për shkak të trazirës emocionale që kishte përjetuar. Hetimet vazhdojnë për të zbardhur plotësisht këtë rast tragjik.