Një megajaht luksoz 47 metra i gjatë, i quajtur “Ethos”, u fundos në brigjet e Qefalonisë, në gjirin e Paleokaravos, në Greqi. Fatmirësisht, të gjithë njerëzit që ndodheshin në bord u evakuuan pa pësuar ndonjë dëmtim të rëndë.

Sipas informacionit të rikonstruktuar, duket se fundosja e pjesëshme e jahtit është shkaktuar nga pakujdesia e ekuipazhit. Në rrjetet sociale janë publikuar video që tregojnë jahtin gjysmë të fundosur, ndërsa po lundronte drejt ishullit të vogël të Itakës. Raportet nga mediat lokale sugjerojnë se një anëtar i ekuipazhit kishte lënë të hapur një derë anësore të anijes, e cila nuk arriti të mbyllej në kohë.

Kur jahti filloi të mbushej me ujë, në bord ndodheshin pesë turistë dhe pesë anëtarë të ekuipazhit. Falë ndihmës nga një varkë private që ndodhej në afërsi, të gjithë personat e pranishëm u evakuuan me sukses. Jahti “Ethos” ka një vlerë prej 19 milionë euro dhe kishte kaluar një rinovim të plotë vetëm disa muaj më parë. Marrja me qira e këtij jahti, që ka kapacitet për të strehuar deri në 12 persona, kushton 213 mijë euro në javë. Hetimet për shkaqet e këtij aksidenti vazhdojnë.