Një burrë nga Virxhinia, i cili është akuzuar për kërcënime me vdekje ndaj zëvendëspresidentes Kamala Harris, është paraqitur në gjykatën federale të hënën. Frank Lucio Carillo, një individ 66-vjeçar, është akuzuar për bërë kërcënime të shumta kundër Harris, presidentit Joe Biden, drejtorit të FBI-së Christopher Wray, disa zyrtarëve të Arizonës dhe të tjerëve në platformën e mediave sociale të krahut të djathtë Gettr.

Sipas mediave të huaja, FBI ka zbuluar 4,359 postime nga Carillo që “synonin zyrtarë të ndryshëm publikë”, përfshirë zëvendëspresidenten Harris. Në disa nga postimet e tij, Carillo dyshohet se ka kërcënuar të nxirrte sytë e Harris dhe ka përshkruar mënyra të ndryshme për të vrarë atë. Ai përdori gjuhë të dhunshme dhe shpifëse në postimet e tij, duke e quajtur Harris një “k*rve” dhe duke shprehur dëshirën për t’i shkaktuar asaj një “vdekje të ngadaltë dhe të dhimbshme”.

Në procesverbalet e gjykatës, janë përfshirë edhe postime të tjera me kërcënime grafike dhe të detajuara kundër nënpresidentes dhe të tjerëve. Një postim tjetër përmbante përmbajtje islamofobike, ku Carillo kishte shkruar se njerëzit duhet “të dalin me armët e tyre dhe të vrasin të gjithë myslimanët”.

Kur agjentët e FBI-së mbërritën në shtëpinë e Carillo-s për të hetuar postimet e tij në media sociale, ai pyeti nëse ata ishin atje “për gjërat në internet” dhe tha: “Unë i postova ato”. Carillo gjithashtu shprehu mendimin se do t’i duhej një avokat, sipas dokumenteve të gjykatës.

Gjatë kontrollit në shtëpinë e tij, agjentët federalë morën dy armë zjarri, përfshirë një pistoletë të blerë në vitin 2023 dhe një pushkë të blerë këtë vit.