Reperi i njohur shqiptar, Noizy, është arrestuar nga policia në Shqipëri pas shpalljes në kërkim nga autoritetet e Kosovës, të cilat kërkuan ndihmën e qytetarëve për kapjen e tij. Noizy, së bashku me DJ Crax dhe Stresin, akuzohet për veprën penale “lëndim i rëndë trupor” pas një rrahjeje që ndodhi në një klub nate në Pejë disa ditë më parë.

Artisti vijon të qëndrojë i ndaluar në Shqipëri deri në ekstradimin e tij në Kosovë. Lidhur me arrestimin e Noizy, ka reaguar edhe miku dhe bashkëpunëtori i tij, Varrosi.

Përmes një postimi në Instagram, Varrosi e quajti ndalimin e Noizy-t të padrejtë dhe shprehu shqetësimin për sigurinë e artistit dhe të familjes së tij, duke e akuzuar sistemin e drejtësisë për standarde të dyfishta. Ai gjithashtu kritikoi personazhet që kërcënojnë dhe përdorin dhunë verbale në rrjetet sociale pa u ndëshkuar.

“Ne respektojmë institucionet, respektojmë ligjet, por sa të sigurtë duhet të ndihemi ne dhe familjet tona kur shohim se drejtësia vepron me disa standarde? Kur shohim që disa personazhe që përdorin TikTok-un dhe rrjetet sociale për të kërcënuar deri dhe me jetë, më pas i dalin zot dhunës së tyre verbale, e prapëseprapë nuk u hy gjemb në këmbë”, shkroi Varrosi.

Varrosi i bëri thirrje ndjekësve të tij për të shpërndarë postimin dhe të mbështesin Noizy-n me hashtagun #Noizyn, duke insistuar se ai nuk është fajtor.