Historiani Zyhdi Shehi, i arrestuar për vrasjen e të moshuarit në një azil privat në Tiranë, do të shtrohet në spitalin psikiatrik. Në seancën për vlerësimin e masës të zhvilluar sot, Gjykata e Tiranës vendosi shtrimin në spitalin psikiatrik për Shehin, pasi ky i fundit ka shfaqur probleme mendore dhe mësohet se vuante nga skleroza.
Gjykata e Tiranës gjithashtu ka caktuar masën arrest në shtëpi për dy infermieret, Nazime Mulla, 31 vjeçe, dhe Glesantina Saraçi, 26 vjeçe, të cilat nuk kallëzuan krimin. Krimi i rëndë ndodhi më 8 gusht në azilin privat “Ruaje Moshën”, në rrugën “Ali Visha”, kur Zyhdi Shehi ka qëlluar disa herë me bastun hekuri shokun e tij të dhomës, Virxhil Vesho, 82 vjeç, duke i shkaktuar vdekjen.
