Dy foshnja binjake, Asser dhe Ayssel, që ishin vetëm katër ditësh, u vranë në një sulm ajror izraelit në Gaza, ndërsa babai i tyre, Mohammed Abu al-Qumsan, ndodhej në një zyrë të qeverisë lokale për të regjistruar lindjen e tyre. Ndërsa ai ishte larg, fqinjët e telefonuan për t’i njoftuar se shtëpia e tyre ishte bombarduar. Nga sulmi mbetën të vrara edhe gruaja dhe nëna e tij.

“Unë nuk e di se çfarë ndodhi. Më kanë thënë se ishte një predhë që goditi shtëpinë. Nuk pata kohë as të festoja për lindjen e tyre,” ka thënë babai, i shkatërruar nga dhimbja. Ministria e Shëndetësisë e Gazës, e drejtuar nga Hamasi, ka raportuar se gjatë luftës, 115 foshnja kanë lindur dhe janë vrarë, duke theksuar përmasat tragjike të konfliktit dhe ndikimin e tij të rëndë në jetët e të pafajshmëve.