Një shpërthim i fuqishëm ka ndodhur mbrëmjen e djeshme në rrugën “Halil Agusholli” në Pejë, ku si pasojë dy persona janë lënduar rëndë. Policia e Kosovës ka njoftuar se ngjarja ka ndodhur rreth orës 20:15 dhe se njësitet relevante të Stacionit Policor në Pejë janë mobilizuar menjëherë për të trajtuar situatën.

Sipas njoftimit të policisë, të lënduarit janë dërguar në spitalin rajonal të Pejës dhe më pas janë transferuar në Qendrën Klinike Universitare të Kosovës (QKUK) në Prishtinë për trajtim të specializuar.

Gjatë hetimeve në vendin e ngjarjes, janë gjetur dhe sekuestruar një armë AK-47, tre karikatorë të së njëjtës armë dhe 90 fishekë me kalibër 7.62 x 39. Policia ka deklaruar se rasti është cilësuar si “Shkaktim i rrezikut të përgjithshëm” dhe “Mbajtja në pronësi, kontroll të paautorizuar të armëve”.

Hetimet për këtë incident janë duke u kryer nga njësiti i Sektorit Rajonal për Hetime të Drejtorisë Rajonale të Policisë në Pejë, i cili është angazhuar për zbardhjen e plotë të rrethanave të shpërthimit dhe për identifikimin e mundshëm të autorëve të përfshirë.