Një javë pasi forcat ukrainase ndërmorën një sulm të papritur në rajonin e Kurskut, autoritetet ruse ende përpiqen të rikthejnë kontrollin mbi situatën në rajon. Ushtria ukrainase ka pushtuar qindra kilometra katrorë të territorit rus, duke rikthyer shpresën dhe optimizmin në radhët e luftëtarëve dhe popullit ukrainas. Aktualisht, sipas burimeve ukrainase, 74 vendbanime në Kursk janë nën kontrollin e ushtrisë ukrainase. Megjithatë, zyrtarët rusë po përpiqen të minimizojnë sukseset e Ukrainës, duke pretenduar se depërtimi është ndalur. Ndërkohë, raportime nga Rusia sugjerojnë se presidenti Vladimir Putin mund të nisë një mobilizim masiv. Ministri lituanez i Mbrojtjes, Laurynas Kasciunas, deklaroi të martën se Rusia po lëviz trupa nga rajoni i Kaliningradit drejt Kurskut, për t’u përballur me sulmin e paprecedentë të Ukrainës.
Tre Opsionet e Ukrainës
Gjenerali australian dhe analist ushtarak, Mick Ryan, ka parashtruar tre skenarë të mundshëm për Ukrainën. Skenari i parë është që forcat ukrainase të ndalojnë ofensivën dhe të konsolidojnë pozicionet e fituara deri më tani, në pritje të fillimit të negociatave. Opsioni i dytë është një tërheqje e pjesshme në pozicione më të mbrojtura. Opsioni i tretë, i preferuar nga aleatët ndërkombëtarë, është kthimi i forcave ukrainase në bazat e tyre përgjatë kufijve të njohur ndërkombëtarisht. Sipas Ryan, kjo do të maksimizonte përfitimet strategjike dhe politike, duke reduktuar rreziqet dhe duke lejuar një rishpërndarje të pjesshme të trupave.
Putin dhe “Koka e Turkut”
Në përpjekje për të zgjidhur situatën në Kursk, Putin ka emëruar Alexei Dyumin, një ish-truproje e tij dhe një nga pasardhësit e mundshëm, për të udhëhequr operacionin për çlirimin e rajonit. Dyumin, i cili ka shërbyer edhe si zëvendëskryetar i GRU, agjencia e inteligjencës ushtarake të Rusisë, është cilësuar si një yll në rritje në rrethin e Putinit. Blogerët ushtarakë rusë raportuan se Putin ka kërkuar një “kokë turku” ndërmjet udhëheqësve të tij më të lartë ushtarakë, duke e konsideruar operacionin në Ukrainë si një nga sfidat më të mëdha për Rusinë që nga Lufta e Dytë Botërore.
Arkitekti i Ofensivës Ukrainase
Në anën tjetër, gjenerali Oleksandër Syrskyi, i cili konsiderohet si një nga strategët më të aftë ushtarakë të Ukrainës, ka marrë drejtimin e ofensivës në Kursk. Syrskyi, i cili ka fituar famë për sukseset e tij në betejën e Bakhmutit, vepron në fshehtësi të plotë në Kursk, duke avancuar pa bërë deklarata publike. Pavarësisht heshtjes së tij, ai mbetet një figurë kyçe në përmbysjen e mundshme të frontit të luftës, dhe suksesi i tij në Kursk mund të shënojë një moment historik për Ukrainën.
