Një 23-vjeçar shqiptar, Endi Bala, rrezikon të dënohet me burgim të përjetshëm në Karolinën e Veriut, pasi akuzohet për tentativë rrëmbimi të dy vajzave të mitura në incidente të ndara. Sipas raporteve të mediave të huaja, Bala u arrestua nga Policia e Sterling Heights pasi tentoi të rrëmbejë një vajzë 7-vjeçare dhe një tjetër 15-vjeçare.

Ngjarja e parë ndodhi në Parkun e lumit Clinton North, ku Bala dyshohet se iu afrua një vajze 7-vjeçare, e tërhoqi nga biçikleta dhe tentoi ta fusë në makinën e tij. Fatmirësisht, tezja e vajzës ndërhyri në kohë, duke e shpëtuar atë nga rrëmbimi. Ndërkohë, rreth një orë më parë, një tjetër denoncim kishte mbërritur në polici për një tentativë të ngjashme. Bala dyshohet se kishte tentuar të rrëmbente një vajzë 15-vjeçare në rrugën Clinton River Road, duke e kapur për kokën dhe qafën dhe duke u përpjekur ta fusë në makinën e tij. Një banor ndërhyri për të ndihmuar vajzën, e cila arriti të shpëtojë dhe të njoftojë autoritetet.

Pas këtyre incidenteve, Bala u arrestua dhe u dërgua në burgun e qarkut Macomb nga magjistrati i Gjykatës së Qarkut 41-A të Sterling Heights, Michael Piatek. Akuzat e rënda kundër tij mund të rezultojnë në një dënim me burgim të përjetshëm.