Policia italiane ka lokalizuar dhe arrestuar një 35-vjeçar shqiptar, i cili qëndronte si emigrant i paligjshëm në zonën e Pesaros, për dyshime lidhur me mbajtjen dhe shitjen e lëndëve narkotike. Lajmi u raportua nga mediat vendase, duke iu referuar burimeve zyrtare nga organet ligjzbatuese, të cilat konfirmuan se gjatë një kontrolli të kryer më 15 gusht, u sekuestruan 65,5 gramë kokainë, e përgatitur për shitje, në kohën e festimeve të “Festa e 15 Gushtit” dhe rritjes së numrit të vizitorëve gjatë fundjavës.

Shqiptari, emri i të cilit nuk është publikuar, kishte qëndruar për rreth një muaj në një hotel afër hekurudhës së qytetit. Policia e vëzhgoi atë ndërsa kryente lëvizje të dyshimta në rrugë dhe pas ndalimit rezultoi se kishte precedentë penalë të mëparshëm për krime të ngjashme në fushën e narkotikëve, veçanërisht në provincën e Riminit.

Në momentin e arrestimit, policia zbuloi 60 gramë kokainë të pastër të fshehur në pjesët intime të të dyshuarit. Kontrolli më pas u shtri edhe në dhomën e hotelit ku ai qëndronte, ku u gjetën prova të tjera: 6 doza me një peshë totale prej 5,5 gramë dhe një shumë prej 540 eurosh, e cila mendohet të ishte përgatitur për shitje.

Shqiptari u arrestua me urdhër të Prokurorit Publik dhe u izolua në paraburgim. Mëngjesin e sotëm, gjykata vendosi ndaj tij masën e sigurisë “arrest me burg” për posedim dhe shitje të lëndëve narkotike.